تاني راجع ليكِ مدني

كلمات: خليل فتحي خليل

والحروف ما توفي حقك
مدني يا اجمل فصول

– خليل فتحي خليل

تاني راجع ليكِ مدني
وبمشي للسني وازور
والقى كل البهجه فيكِ
والمسرات هن حضور
وامشي شارع النيل واقالد
في زهورك وفي الشجر
والقى كل الكون يغني
مدني يا أجمل خبر
والقى أصحابي الهناك
ونبدأ لي مدني الغنا
عباس جزيرة يغني ليا
مدني اجمل سوسنه
والرفاعي يقول يردد
انتو اولاد حينا
والقي سرحان في الحدائق
مالي كل الكون غنا
وامشي لي طارق وازورو
اصلي من دردق هنا..
وترجع الذكري الحبيبة

وفي كل حاره اقيف واغني
مدني يا ام المداين
انت للروح التمني
انت يا ام الفنون
ويكفي مساحك بغني
وكاشفك الحير عوالم
انتي ليهو وانتي مني
والثنائي الفي الجزيرة
اسعدو العشاق دوام
هم حاملين الرسالة
وليكِ رافعين التمام
انت يا درة بلادي
انتي جد عالية مقام
ابو الامين الاصلو منك
مشتهيك وفيك بغازل
وياما وصف ليك حبو
ماهو عنك يوم تنازل
وعركي شال كل السماحة
من ارض مليانه خير
وياما غني وقال بحبك
مدني يا اجمل عبير
كيف اقول فيك واوصف
انت ساحرة لكل زول
والحروف ما توفي حقك
مدني يا اجمل فصول
وكل ما يشرق صباح
عايز اقول فيك واقول